澳門除咗豬扒包、葡撻等飲食文化以及賭場文化，仲有一樣嘢出名，就係耶穌會傳教士利瑪竇。

其實利瑪竇响意大利出世，細個畀爸爸送去耶穌會學校讀書。佢後來讀神學，成為耶穌會教士，响明朝萬曆年間到中國傳教，落腳第一站就係澳門。利瑪竇响澳門學中文，仲學埋粵語，啱啱好來自日本嘅天正遣歐使節團路過，佢趁機又學咗少少日語，真係有語言天份。

澳門大三巴牌坊附近幾年前整咗個利瑪竇銅像，右手揸毛筆，左手有古籍，著住明朝士大夫服飾而唔係外國服飾，配合佢當時改穿華服嘅做法，據指銅像所在位置係耶穌會聖保祿學院遺址。唔單止銅像，澳門仲有利瑪竇中學，紀念依位促進中西文化交流嘅使者。

其實除咗澳門，利瑪竇仲去過肇慶、廣州、南京同北京等地，佢當年親自操刀，又試過同中國文人合譯西方著作，更繪畫第一幅中文世界地圖，建造中國第一座西式天主教堂。有機會再同大家研究研究佢嘅足跡。